Asociación Galega de Editores

Edicións do Castro foi concibida por Luís Seoane dentro do Laboratorio de Formas, quen no 1963 publicou con este selo os primeiros orixinais posibles: O Touro Xúbilo e O Meco, colección de gravados que xa tiñan un significado social para quen puidera entendelos.

A creación desta editorial respondía á intención de estudar e divulgar a memoria histórica de Galicia, obxectivo principal do programa de actuacións do Laboratorio de Formas, a quen se deben, xunto con outras empresas, as Edicións do Castro.

Co tempo, foron aparecendo diferentes coleccións; hai que subliñar así a aparición de documentos : colección emblemática que se dedica á divulgación de testemuñas da nosa historia máis recente, Publicacións do Seminario de Estudos Galegos: colección de libros científicos, Cadernos do Seminario de Sargadelos e tamén revistas como Gallaecia, Unión Libre ou Luzes , mais tamén coleccións de libros de ensaio, historia, e tamén de literatura: teatro, poesía e narrativa. Precisamente é un libro de narrativa para nenos o que se converteu no máis vendido da historia da literatura galega: Memorias dun neno labrego, de Xosé Neira Vilas.

Hoxe, despois de corenta anos de labor editorial traballando pola nosa historia, pola nosa lingua e a nosa cultura, e con máis de 1350 títulos publicados, vimos de iniciar, en colaboración, outra nova colección: a Biblioteca do Exilio, que simboliza o espírito que anima a esta empresa. Esta colección pretende loitar contra o silencio e o esquecemento que rodearon aos nosos exiliados republicanos de 1939, e recuperar así un patrimonio intelectual que complete a historia da literatura e da cultura do século XX.