NOVIDADES DE KALANDRAKA EDITORA
(15/05/2008) Kalandraka celebra o Día das Letras Galegas e a semana na que se inscribe esta data co lanzamento da primeira tradución ao galego de Julio Cortázar para público infantil. "Discurso do oso", con ilustracións de Emilio Urberuaga e publicado tamén en portugués, é un relato que pertence ao libro "Historias de cronopios y de famas", onde o autor arxentino reúne unha serie de relatos imposibles, co humor surrealista que caracteriza o seu estilo narrativo. Unha obra que reflexiona sobre a estraña e solitaria vida dos seres humanos e que permite achegarlles aos lectores máis novos a obra dun dos grandes escritores da literatura universal.
Outra das apostas de Kalandraka para este mes de maio é a tradución de "Galego á beira do mar", de Juan Farias (A Coruña, 1935), unha obra na que o autor galego traza unha conmovedora historia chea de afecto, nostalxia e melancolía sobre as lembranzas dun ancián. Esta última obra de Farias -cuxa traxectoria foi recoñecido co Premio Iberoamericano de Literatura Infantil e Xuvenil e co Premio Nacional de Literatura Infantil e Xuvenil- destaca pola precisión coa que describe o mundo rural e mariñeiro, con ilustracións de Xosé Cobas (Negreira, 1953)...
INSTITUCIÓNS CULTURAIS GALEGAS
(14/05/2008) A nova Axencia Galega de Industrias Culturais (AGADIC) substituirá o Instituto Galego de Artes Escénicas e Musicais (IGAEM) antes de fin de ano, despois de que o Parlamento aprobara o ditame elaborado pola Comisión IV de Educación e Cultura. Polo momento, o novo ente xa puxo en marcha iniciativas como o 'Crédito Cultura'. A Lei de Creación desta axencia entrará en vigor logo da súa publicación no DOG e, a continuación, aprobarase vía decreto o seu Estatuto de Funcionamento.
AGADIC centrará o seu traballo no apoio á produción privada galega no ámbito da cultura, nos campos da edición do libro, as artes escénicas e musicais, o audiovisual e as artes plásticas e visuais. Substituirá ao IGAEM e estenderá o seu radio de acción para funcionar como organismo de apoio á produción e distribución do conxunto das industrias culturais...
A festividade do Día das Letras Galegas 2008 percorreu un longo camiño dende a primeira homenaxe que un 17 de maio de 1963 recibía Rosalía de Castro. Corenta e cinco anos despois é o mestre e escritor Xosé María Álvarez Blázquez, nado en Tui o 4 de febreiro de 1915, o protagonista desta data. Coñecido sobre todo pola súa obra poética, ben representada por "Canle segredo" (considerada pola crítica como un dos seus fitos e que non foi publicada en Galicia ata 1976), Álvarez Blázquez, que foi tamén libreiro e editor (a través do selo Monterrey), tivo moitas ocupacións ao longo da súa vida, un bo número delas directamente vinculadas á defensa e preservación da nosa cultura: escritor, investigador, articulista, orador, historiador ou arqueólogo. Morreu en Vigo, cidade que foi cronista oficial, en 1985.
Precisamente na cidade olívica é onde a Real Academia Galega (RAG) ten previsto celebrar o sábado 17 de maio o seu acto de homenaxe a Xosé María Álvarez Blázquez, que tamén foi académico. Así, a partires das 12:30 lerán no concello de Vigo os seus discursos Xosé Luís Méndez Ferrín e Darío Xohán Cabana, presentados polo presidente da institución, Xosé Ramón Barreiro. Porén, nesta ocasión non estarán acompañados do presidente da Xunta, Emilio Pérez Touriño, nin da secretaria xeral de Política Lingüística, Marisol López, que eses días se atoparán de viaxe oficial e vivirán o Día das Letras Galegas en Bos Aires.
Máis información >>
