Asociación Galega de Editores

Nova Galicia Edicións, S. L., editorial fundada en Vigo no ano 1984, nace co obxectivo de dar a coñece-la nosa cultura ó resto do mundo. Debido ó seu rápido crecemento chegou a contar con cinco locais espallados pola cidade de Vigo. Isto motivou a necesidade de centralizar tódolos seus servicios nunha única nave. A nosa nova sede situada na Avenida Ricardo Mella, 143 de Vigo ocupa unha superficie de 2.500 m2.

Nova Galicia Edicións, S. L. está a facer unha proxección da arte e a cultura coa súa presencia nas principais feiras do libro de todo o mundo, co resultado, nestes intres, de negociacións de edicións das súas obras noutras linguas e mesmo ventas en máis de cincuenta países, como son: China, Estados Unidos, Puerto Rico, México, Colombia, Malasia, Irán, Italia, República Dominicana, Brasil…

No ano 1997 inicia os seus ambiciosos proxectos: "Artistas Pintores", "Artistas Arquitectos" e "Artistas Escultores", que recollen as figuras máis representativas da nosa arte. Hoxe en día estes proxectos son xa unha realidade, con 30 volumes editados ata o de agora, na que colabora un equipo humano de máis de 500 persoas entre autores, fotógrafos, deseñadores, infógrafos, maquetadores... Lévanse tratados máis de catrocentos artistas e reproducidas máis de vinte mil obras de arte. Estamos a falar pois dun gran Museo de Arte en soporte papel.

Seguindo na liña da arte, vén realizando dende o ano 2000 a edición da colección "Nova Galicia Arte", monografías dedicadas ós máis importantes artistas da pintura universal, libros de peto de fácil lectura. Por outra parte, a súa actividade neste campo abarca tamén a edición de catálogos de diversas exposicións, buscando sempre a mellor calidade para obter un magnífico resultado final.

Na súa aposta pola promoción da arte e a cultura, Nova Galicia Edicións segue dedicando gran parte da súa actividade e dos seus esforzos á investigación de todos aqueles temas que resultan relevantes no panorama artístico e cultural. Froito destes traballos é o proxecto "Arte e Cultura de Galicia e Norte de Portugal", que supuxo un traballo de dous anos cun estudo exhaustivo dos museos, a arqueoloxía, a etnografía, a arquitectura, a pintura e a escultura de Eurorrexión Galicia-Norte de Portugal.

Comezando novas liñas editoriais, fixo a súa primeira incursión no mundo do libro infantil e xuvenil no ano 2003 publicando non só narrativa e contos ilustrados, como pode ser a colección "Contos de mamá", senón tamén libros didácticos, destinados tanto aos rapaces como a seus pais e mestres.

Dentro desta nova liña, cabe salientar dúas coleccións: "Saber para vivir" e "Que me dis de..." que tratan sobre temas de actualidade. Trátase de dúas obras de referencia dirixidas á poboación máis nova (nenos e adolescentes), onde todos os temas son tratados desde un punto de vista didáctico co fin de informar e formar aos seus lectores; de extensión curta, cunha linguaxe asequible e actual, de agradable lectura, deseñados e presentados cunha ampla imaxe visual fácil de entender pola xente nova.