Asociación Galega de Editores

A Editorial Nigratrea nace da fusión de dúas editoriais, unha galega, NIGRA, radicada en Vigo, e outra asturiana, TREA, con enderezo en Xixón. Tratábase de aproveitar a experiencia de dúas empresas de parecida traxectoria e con intereses editoriais converxentes co propósito de tirar un maior rendemento editorial a iniciativas parellas, analizando conxuntamente factores de éxito ou fracaso en aquelas seccións e que optimizan conxuntamente os seus recursos humanos, financeiros e comerciais.

O troco de experiencias non supón a repetición mecánica de "planos editoriais" intercambiables posto que, obviamente, cada territorio ten a súa propia especificidade. De calquera maneira, a día de hoxe, a experiencia foi positiva e os resultados satisfatorios.
A produción editorial de Nigratrea, que se desenvolve en galego e castelán indistintamente, xira arredor de catro coleccións básicas: Libros da Brétema, Maior, Caritel e Andaina. Edítanse, por suposto, libros fóra destas coleccións, mais na medida do posible, tratamos de encaixar a produción editorial nunha das seccións citadas. Cada unha delas responde a propósitos específicos.
Brétema, por exemplo, acolle libros de caráter antropolóxico, histórico ou filolóxico e ten, no seu sentido máis profundo, o caráter de colección que trata de rescatar obras de importancia histórica na cultura galega, alternándoas con novas achegas que enriquezan o acervo cultural galego.
O carácter das coleccións Maior e Caritel está determinado pola súa vocación "patrimonial", é dicir, pola actualización de proxectos que teñan que ver coa pintura, escultura e arquitectura galegas, pazos, castelos, conventos, etc., mais tamén co que se chamou "bens intanxibles"–mar, paisaxe, natureza..., considerados igualmente bens patrimoniais.
Andaina, a máis popular das coleccións, está orientada a un público máis amplo, pero non por iso é menos esixente, e nela hai editados dende libros que poderiamos cualificar de "turísticos" a receitarios da cociña tradicional galega, pasando por incursións, breves pero científicas, na historiografía galega. Pola súa brevidade e concisión, é a máis dinámica das coleccións, a de máis espallamento e presenza no mercado.