Asociación Galega de Editores

Edicións Lóstrego traballa de maneira prioritaria o sector do libro galego de divulgación en formato de peto. O seu principal obxectivo é abrir o idioma galego a temas da cultura universal para favorecer a verdadeira normalización lingüística.
Dirixe as súas obras a un público masivo, ao que pretende achegar temas de interese xeral e de actualidade, presentados nun formato práctico e económico.
Na colección "A Memoria de Galicia" tentamos dar resposta á pregunta formulada no seu primeiro volume: Para que serve a historia de Galicia?, mediante a publicación de ensaios divulgativos sobre a historia do noso país.
"O saber de peto" ofrece breves ensaios sobre todo tipo de temas, tanto de carácter xeral (o universo, a ecoloxía, a música clásica, a relixión, etc.) como referidos ao ámbito galego (a prehistoria, os romanos ou os xudeus de Galicia).
Coa colección "Ex Cáthedra" Edicións Lóstrego abre a súa liña editorial ao ensaio científico especializado de carácter histórico, con traballos de investigación de diversa índole.
Por último, en "12 grandes" introducímonos no xénero biográfico. E, a partir da selección de doce personaxes relevantes, propoñemos o achegamento a diferentes temáticas como a filosofía, a ciencia, a arte, etc.