Asociación Galega de Editores

Alvarellos Editora iniciou a súa andaina en Lugo no mes de maio de 1977. Galicia vivía daquela un segundo Rexurdimento das súas Letras e nese intre o polifacético Enrique Alvarellos Iglesias (A Coruña, 1931-Lugo, 2004) decidiu poñer en marcha a súa nova empresa cultural.

Alvarellos Editora deulle a oportunidade de publicar a moitos escritores noveis que logo, durante os anos oitenta, se foron consagrando no panorama cultural do noso país, e tamén a plumas veteranas. Manuel María, Xabier Alcalá, Antón Risco, Xosé Lois García ou Xabier Rodríguez Barrio foron algúns deles. Naqueles días, esta empresa chegou a facer un catálogo de máis de cen obras (narrativa, poesía, teatro, música, ensaio).

Nos anos noventa especializouse en edicións a todo luxo de facsímiles dos séculos XVIII e XIX, cruciais na historia de Galicia, como é o caso dos tomos galegos da España Sagrada, as obras completas en sete volumes do Cura de Fruime, Argos Divina ou a Arquitectura de Vitrubio.

Hoxe, Alvarellos Editora posúe un catálogo de máis de cincuenta títulos, e inicia en 2005 unha nova andaina baixo a dirección de Henrique Alvarellos Casas, fillo do fundador, xornalista e autor de varios libros.

Nesta nova época, a editorial principia varias coleccións literarias, entre elas, a denominada "Colección Rescate", unha serie de volumes onde se fusionan xornalismo e literatura e onde se recuperan textos esquecidos ou dispersos de plumas ilustres de Galicia. O primeiro deles, publicado en abril de 2005, é o libro Viaxes e xantares por Galicia, de Álvaro Cunqueiro, ao que seguiron os volumes dedicados a Vicente Risco, Paco del Riego, Leandro Carré ou, no outono de 2006, a Camilo José Cela coa antoloxía Retorno a Iria Flavia.

Alvarellos Editora celebrou en 2007 os seus trinta anos de existencia. Nos seus inicios exhibía como lema: "Loite connosco pola nosa cultura". Nesa defensa do país tenta seguir despois de todo este tempo.