Asociación Galega de Editores

"Peaxes", entre as novidades de Edicións Xerais de Galicia

Luns, 16 Marzo 2009

Edicións Xerais de Galicia presenta diversas novidades dentro das coleccións de narrativa, poesía e Xerais Merlín. O sombreiro chichiriteiro, o primeiro libro infantil de Manuel Rivas e ilustrado por Patricia Castelao, acaba de saír do prelo neste mes de marzo. Edicións Xerais de Galicia presenta O sombreiro chichiriteiro como a historia de amizade dun sombreiro moi especial, o chichiriteiro, e dun neno valente chamado Simón, que viaxarán xuntos ao corazón do mundo.

Amáis, dentro da colección Xerais Poesía, Edicións Xerais de Galicia presenta o novo traballo de Claudio Rodríguez Fer, Ámote vermella, a memoria esquecida das mulleres represaliadas, con ilustracións de Sara Lamas. Ámote Vermella é o berro contra o exterminio atroz das mulleres desfeitas pola represión, contra o seu esquecemento inxusto e o silencio cómplice no que se mantivo  a estas vítimas do fascismo, ao tempo que chaman en solidariedade con todas as comunidades do mundo que padecesen calquera ditadura do terror.

Con Ámote vermella, o poeta Claudio Rodríguez Fer conclúe a súa triloxía poética sobre a memoria histórica iniciada con Lugo Blues e seguida d'A Loita continúa

Peaxes e Para seguir bailando, as novidades de Xerais Narrativa

Dez magníficos relatos constitúen o novo libro de Francisco X. Fernández Naval, Para seguir bailando, editado por Xerais, onde se condensan os temas preferidos do autor: a descuberta da memoria silenciada, a condición fantástica do cotián, o abandono do medio rural, o abuso exercido sobre a muller ou o asombroso territorio da sombra. Para seguir bailando amosa a certeza de que debemos seguir bailando neste xogo da vida que é o máis firme valor que posuímos.

Xerais Narrativa complétase con Peaxes, de Santiago Lopo, fraccións de vidas que se cruzan na autoestrada. En Peaxes, a novela coa que Santiago Lopo debuta no catálogo de Xerais, conflúen todas as Galicias existentes e as imaxinadas, demostrando que a realidade e a ficción comparten a miúdo o noso destino.