Asociación Galega de Editores

Editoriais anglosaxonas crean nova liña de negocio

Mércores, 25 Xaneiro 2012

O observatorio da edición dixital publica que algunhas editorias anglosaxonas están creando novas liñas de negocio e servizos á marxe do  core business, da produción de libros, e as veñen centrando nos seus autores e autoras.  

Random House UK lanzou neste mes de xaneiro Random House Speakers en asociación con The London Speaker Bureau, mediante o cal ofrece aos seus autores como conferenciantes para dar conferencias, participar en mesas redondas , etc. Nestes momentos participan 13 autores e autoras, entre os que destacan o especialista en medio ambiente e sostenibilidade Steve Benbow, o novelista Louis de Bernier, o  autor de libros de viaxes,  Tim Butcher, un historiador de arquitectura, Dan Cruickshank, e a escritora de bestsellers Donna Leon. A iniciativa venlle seguindo os pasos a outra semellante que xa funciona con éxito nos EEUU baixo o título: Random House Speakers Bureau.

                                                            Tamén as axencias literarias

O servizo ofrecido aos autores tamén está sendo utilizado por algunhas axencias literarias, como é o caso de Conville & Walsh, que en xuño do ano pasado creaba un servizo similar chamado  Hire Intelligence.

Outra liña de negocio complementaria é a creación de cursos. Un exemplo sería Faber Academy, creada pola editorial Faber, que ofrece programas diversos en relación coa escrita e a  edición.

Fonte

Imaxe