Asociación Galega de Editores

A FGEE falla os premios ao Fomento da Lectura nos medios de comunicación

Martes, 07 Setembro 2010

A Federación de Gremios de Editores de España (FGEE) concedeu os IX Premios ao Fomento da Lectura 2010 aos Medios de Comunicación, á axencia de noticias EFE, na categoría de Prensa, ao programa "Páxina 2" da 2 na categoría de Televisión e ao programa "Pompas de papel" de Radio Euskadi, na categoría de Radio. Os galardóns entregaranse en Barcelona durante a celebración da 28 edición de Liber, a Feira Internacional do Libro, que terá lugar do 28 de setembro próximo ao 1 outubro.

Con estes galardóns, a Federación quere subliñar o traballo que os profesionais do Xornalismo realizan para promover o hábito lector a través da difusión de informacións relacionadas cos libros. O obxectivo destes premios é dobre: por unha banda recoñecen publicamente o labor realizado pola profesión xornalística no fomento da Lectura en España, e por outra, tratan de incentivar ese labor de difusión e de promoción do hábito lector entre os Medios.

O Xurado dos Premios ao Fomento da Lectura en Bibliotecas abertas ao público concedeu o galardón na edición 2010 á Biblioteca Municipal de Burgos e valora a súa implicación no desenvolvemento do gusto pola lectura entre nenos e maiores con actividades que fomentan a participación familiar nos actos culturais da biblioteca. O Premio Boixareu Ginesta ao Libreiro do Ano outórgase á Libraría Diego Marín de Murcia, unha referencia entre os lectores desta cidade.