Asociación Galega de Editores

A web de Galaxia permite ler libros sen saír do "site"

Mércores, 01 Setembro 2010

Xa é posible, dende primeiros de agosto, ler boa parte dos libros do catálogo da Editorial Galaxia sen deixar en ningún instante a navegación pola propia web. Así, a diferenza doutras páxinas nas que hai que abandonar o 'site' no que aparece o libro para desprazarse ao de Google, con esta nova aplicación conseguen que, unha vez vistas e lidas as páxinas desexadas, o internauta volva á  web por se é do seu agrado consultar un novo texto.

Desta maneira, calquera internauta que estea a navegar pola web da editorial e queira acceder á lectura dunha parte moi significativa dun libro que estea subido a 'Google Books', atopará debaixo do título un botón de 'Vista Previa'. Ao premelo, abriráselle unha nova fiestra dende a que accederá ao libro para, como se nunha librería estivera, follealo de vagar e facerse, así, unha idea máis completa do seu contido. Daquela, a visita virtual á librería e aos textos de Galaxia máis apetecidos, aparécese como máis doada e accesible.

Fonte: Galaxia