Asociación Galega de Editores

Santander acolle o XXVI Encontro sobre a edición

Martes, 06 Xullo 2010

A Federación de Gremios de Editores de España promove, dende 1984, todos os anos a celebración dun seminario dedicado á edición, froito dun convenio de colaboración que asina coa Universidade Internacional Menéndez Pelayo, co obxectivo de convocar e propiciar un foro de debate sobre as inquietudes do sector do libro do que se desprendan unhas conclusións que axuden aos seus profesionais no seu quefacer diario, de propiciar un lugar de encontro e de potenciar como sempre fixo a idea do editor como axente fundamental desta industria cultural.

Co título O futuro da edición: papel e e-book, o XXVI Encontro sobre a Edición terá lugar os días 7, 8 e 9 de xullo no marco do Palacio da Magdalena de Santander e contará con Núria Cabutí, Conselleira Delegada de Random House Mondadori, como directora. As novas experiencias editoriais, dende diversas perspectivas, serán o tema central desta convocatoria.

O libro electrónico comeza a ser unha realidade e a convivencia co libro tradicional empeza a ser aceptada pola poboación española que recoñece os lectores dixitais como un futuro no presente. Pero ¿que significado ten o e-book na nosa industria?, ¿como convivirán o libro tradicional e o e-book?, ¿son excluíntes ou complementarios?, ¿relacionaranse da mesma maneira escritores, editores e lectores?, ¿promocionaranse os libros como até agora ou haberá unha nova forma de relación cos lectores?