Asociación Galega de Editores

Ideaspropias lanza un novo selo editorial en Sudamérica en colaboración coa colombiana Ediciones de la U

Mércores, 30 Xuño 2010

Ideaspropias Editorial subscribiu un convenio coa empresa colombiana Ediciones de la U co obxectivo de potenciar a difusión das súas publicacións en Sudamérica. O resultado desta colaboración é un novo selo de coedición mediante o que os manuais da empresa editora viguesa comercializaranse en Bolivia, Colombia, Costa Rica, Ecuador, O Salvador, Guatemala, Fonduras, Panamá, Perú, Porto Rico, República Dominicana e Venezuela.

En virtude desta colaboración lanzarase, inicialmente, unha selección de vinte títulos do catálogo de máis de trescentos manuais formativos de Ideaspropias Editorial coa imaxe do novo selo editorial, que serán promocionados, distribuídos e comercializados por Ediciones de la U.

O xerente de Ideaspropias Editorial, Pedro López Gómez, destaca que "existe un abano potencial de clientes que captar con novos proxectos e coa aposta polos mercados internacionais" e engade que este compromiso se materializa con iniciativas como este proxecto de colaboración.