Asociación Galega de Editores

O III Premio Compostela para Álbums Ilustrados vaise para Catalunya

Mércores, 07 Abril 2010

A obra titulada "La Familia C", con texto de Pep Bruno (Barcelona, 1971) e liustracións de Mariona Cabassa (Barcelona, 1977), é a gañadora do III Premio Internacional Compostela para Álbums Ilustrados, que organiza Kalandraka Editorial. O galardón, cunha dotación de 12.000 euros, leva aparellada a publicación do libro en galego, castelán, catalán, euskera e portugués. Os traballos do catalán Raimon Juventeny Corberó, "Manual del buen paseante. Descripción en veinte puntos", e da arxentina Vanina Soledad Starkoff, "Bailar en las nubes", son os finalistas do certame.

O xurado estaba formado pola concelleira de Educación do Concello de Santiago, Mercedes Rosón; o tradutor e experto en literatura infantil e xuvenil, Xabier Senín; os ilustradores Gusti e David Pintor; Manuela Rodríguez en representación de Kalandraka; o xefe do Departamento de Educación de Santiago, José Manuel Rodríguez-Abella, e Beatriz Varela, como secretaria técnica.

"La Familia C" conta a historia dunha familia que adora o circo "e iso dálle cor á súa vida", explicou o autor, Pep Bruno. As ilustracións, realizadas con técnica mixta, destacan polo seu colorido e forza expresiva. En conxunto, é un álbum que o xurado definiu como "imaxinativo, orixinal e moderno".

Fonte: Blog de Kalandraka