Asociación Galega de Editores

Máis de 2.500 escolares de Vigo achegaranse ao mundo da arte dun xeito lúdico e creativo coa campaña Contarte

Martes, 06 Abril 2010

A Concellaría de Educación do Concello de Vigo, en colaboración con OQO editora, bota a andar hoxe a segunda edición de Contarte, mes da arte e a literatura infantil, coa que prevé achegarlles a máis de 2.500 escolares de Vigo o mundo da arte, a través do álbum ilustrado. Dun xeito orixinal e lúdico promoverase o desenvolvemento do espírito creativo dos cativos; ofreceránselles medios para aprender novas formas de mirar; ao tempo que se incidirá no fomento do hábito lector entre os máis novos.

Nesta edición serán un cento as actividades de animación á lectura e plástica creativa que se desenvolverán do 7 ao 30 de abril, coincidindo co mes no que se celebra o Día Internacional do Libro Infantil.

Durante este mes os nenos e as nenas gozarán dun obradoiro de animación á lectura, Qon ollo!, baseado nos libros de OQO A bruxa regañadentes e Pulga e Xigante. Nesta actividade os nenos e as nenas de 1º, 2º e 3º de Primaria recrearán os seus propios escenarios fantásticos nunha proposta plástica deseñada para fomentar a participación de todos os pequenos.

Fonte: OQO editora