Asociación Galega de Editores

Compostela acollerá o I Congreso Nacional de Artes Gráficas

Luns, 05 Abril 2010

A Federación Empresarial de Industrias Gráficas de España (FEIGRAF) conxuntamente coa Asociación de Empresarios de Artes Gráficas de Galicia (AEAGG) vai celebrar do 10 ao 12 de xuño do 2010, o Congreso Nacional de Artes Gráficas en Santiago de Compostela, coincidindo coa celebración do Ano Santo Xacobeo. Ambas as entidades fixeron a presentación nacional deste evento o 24 de setembro na Casa de Galicia en Madrid ante numerosos asistentes.

Este evento, que ten a finalidade de reunir por primeira vez na capital de Galicia a profesionais e expertos de todo o territorio nacional, terá un contido extraordinariamente didáctico e pretende ser un acontecemento empresarial de primeira orde que analizará o presente e futuro deste importante sector de actividade.

O Congreso Nacional de Artes Gráficas vai dirixido a todo o sector gráfico de España que conta con 129.800 traballadores, situados en 11.362 empresas, que no quinquenio 2004-2008 importaron maquinaria por un valor acumulado de 5.045,45 millóns de euros, segundo datos do estudo do sector do 2008 elaborado pola FEIGRAF.