Asociación Galega de Editores

Kalandraka recibe en Korea un premio internacional polo libro "O león Kandinga"

Martes, 30 Marzo 2010

"O león Kandinga", de Boni Ofogo e Elisa Arguilé, editado por KALANDRAKA, foi un dos gañadores da segunda edición do concurso internacional CJ Picture Awards na categoría de Novas Publicacións. Neste apartado competían 635 libros de 39 países. A organización do certame vén de participar na Feria Internacional do Libro Infantil e Xuvenil de Boloña, cun stand no que amosou as obras premiadas.

A Fundación CJ de Cultura (CJ Culture Foundation) de Corea organiza o certame, co patrocinio do Ministerio de Cultura, Deportes e Turismo dese país, a Fundación Centro Cultural de Corea e a Asociación de Editores Coreanos. Ademais de KALANDRAKA, con "O león Kandinga", tamén resultaron distinguidos outros catro álbums editados por Media Vaca (España), Planeta Tangerina (Portugal), Hélium (Francia) e Dar Onboz (Líbano).

Esta entidade tamén premiou o traballo de cinco ilustradores procedentes de Irán, Corea, Alemaña e Francia; unha categoría á que optaban 930 orixinais de 42 países. O xurado estaba formado polas editoras Dinah Stevenson e Kozue Shibata, o deseñador Pietro Corraini e o profesor e ilustrador Sun Kyung Cho.

Fonte: Blog de Kalandraka