Asociación Galega de Editores

Editores galegos intercambian experiencias con representantes da edición danesa e húngara na Feira de Boloña

Xoves, 25 Marzo 2010

O expositor de Galicia da Feira do Libro Infantil e Xuvenil de Boloña serviu na tarde de onte como lugar de encontro entre representantes do sector editorial de Dinamarca e Hungría con editores e escritores galegos. Algunhas das cuestións que se trataron foi a posibilidade de levar ata eses países o libro galego e tamén con tradución á inversa, para iso, a representante do Instituto Danés de Literatura, Annete Bach, ofreceu cumprida información das axudas existentes naquel país á tradución de obras. Ademais, a xuntanza multilateral serviu como piar para asentar futuras colaboracións e intercambios culturais entre os distintos países. Neste encontro estiveron, representantes das editoriais Galaxia, Baía, A Nosa Terra, Hércules, ademais dos escritores Fina Casalderrey e Antonio G. Teijeiro, encabezados polo presidente da AGE, Alfonso García Sanmartín.

Por outra banda, os editores que estes días visitan a Feira de Boloña aproveitarán a xornada de hoxe para manter diversas xuntanzas con outros Gremios de España presentes no evento como o de Euskadi ou Catalunya.

Actividade das editoras 

Ademais do traballo editorial conxunto, as empresas con stand propio na Feira realizaron actividades propias con importante presenza de público. Kalandraka, pola súa banda, presentou o encontro "O premio Compostela: un camiño en sete leguas". A directora de Kalandraka Italia, Lola Barceló, e Silvia  P. Tato, editora de Kalandraka, foron as encargadas de dar a coñecer este proxecto no Salón Melodía do recinto feiral. 

Por outra banda, OQO Editora presentou, xunto a Imagina International Sales, OQO filmes: From picture books to audiovisual animation: quaility entertainment  for children.