Asociación Galega de Editores

Boloña acolleu a presentación do 32º Congreso do IBBY que se celebrará en Compostela no mes de setembro

Mércores, 24 Marzo 2010

A Feira do Libro Infantil e Xuvenil de Boloña acolleu onte a presentación do Congreso da International Board on Books for Young People (IBBY), que terá emprazo en Santiago na súa 32 edición entre o 8 e o 12 de setembro.

O director xeral de Cultura, Francisco López, gabou na rolda de prensa o traballo extraordinario desempeñado polo IBBY ao que definiu como "unha actividade de asociacións de 70 países na que interviñeron infinidade de persoas nos debates, nas planificacións e nas directivas". Respecto á decisión de IBBY de emprazar o seu congreso na cidade de Santiago, rexeitando outras candidaturas como París ou Amsterdam, Francisco López valorou a decisión como un "novo impulso ao panorama mundial do libro infantil e xuvenil" tras pasar por cidades como Viena, Florencia, Tokio, Nicosia ou Rio de Xaneiro.

Na rolda de prensa da presentación do Congreso, fíxose pública a concesión dos Premios Christian Andersen, os "premios Nobel" de literatura intantil e xuvenil, concedidos polo IBBY e que serán entregados en Santiago. Os galardoados son Jutta Bauer (Alemaña) no apartado de Ilustración, e David Almoud (Reino Unido) no apartado de narrativa infantil.

Premiados

O xurado recoñeceu en Almond «a voz única dun creador dun realismo máxico para os nenos». Así mesmo, destacaron que o escritor logra «capturar a imaxinación dos seus mozos lectores e motivarlles a ler, a pensar e a ser críticos», á vez que o seu «uso da linguaxe é sofisticado e logra traspasar as barreiras da idade».

Bauer, responsable do libro Opas Engel (o anxo do avó ), foi elixida pola súa «aproximación filosófica, a súa orixinalidade, a súa creatividade e a súa habilidade para comunicar cos mozos lectores».

Cada dous anos, a IBBY recoñece a un autor e a un ilustrador cuxas obras constitúan unha contribución significativa á literatura infantil e xuvenil.