Asociación Galega de Editores

Galaxia editará tamén en dixital o Premio García Barros

Xoves, 11 Marzo 2010

O premio de novela Manuel García Barros, que convoca hai xa máis de dúas décadas o Concello da Estrada, está xa consolidado coma un referente da literatura galega.

O nome da Editorial Galaxia está detrás deste éxito. Onte o alcalde estradense, José Antonio Dono, e o director da editorial, Víctor Fernández Freixanes, renovaban o acordo de colaboración para seguir publicando as novelas gañadoras do certame por outros dez anos máis. "Para nós é un premio moi querido", apuntou Freixanes, que destacou ademais o esforzo do Concello da Estrada por seguir mantendo a convocatoria. O editor citou tamén ó Blanco Amor e ó premio Xerais como os dous eixes restantes que conforman, xunto coa cita literaria estradense a historia da narrativa galega contemporánea, e destacou o éxito acadado coa traducción a varias linguas dalgún dos últimos libros premiados, como As rulas de Bakunin, de Antón Riveiro Coello.

Pola súa banda, Dono amosouse confiado en continuar a colaboración con Galaxia para seguir gañando prestixio. Na firma do convenio estiveron presentes tamén varios edís estradenses e Carlos Lema, director de edicións de Galaxia, que na vindeira edición apostará tamén pola edición para o e-book, (ao igual que acontecerá co premio Valladares de poesía) para levar a literatura galega ata as novas tecnoloxías.

O premio de novela está dotado con 9.000 € e este ano celebrarase a vixésimo segunda edición do certame. O prazo de presentación dos exemplares remata o vindeiro 16 de abril.

Fonte: El Correo Gallego