Asociación Galega de Editores

As editoras galegas independentes xúntanse nun foro de debate en Compostela

Martes, 02 Marzo 2010

Son editoriais ou colectivos que editan e autodenomínanse "axentes da edición independente". Dende hoxe teñen un foro propio onde fotografar o seu sector e pulsar dinámicas. As primeiras Xornadas Galegas da Edición Independente, como as bautizaron os seus organizadores, Estaleiro Editora e o colectivo Corsárias, nacen con vocación de continuidade. Pretenden converterse nun autorretrato anual. Desenvolveranse até o venres na biblioteca Ánxel Casal de Santiago en dúas sesións diarias, a primeira ás cinco da tarde e a segunda ás sete.

O colectivo libertario Ren de Ren abrirá a programación esta tarde coa presentación d'A civilización enferma, o seu segundo volume colectivo, unha crítica implacábel da "industrialización da vida". A seguir, coloquio a cinco bandas na procura da "paisaxe indefinida" da periferia editorial: Paco Macías, de Edicións Positivas; Miguel R. Penas, director de Através, a editora da Associaçom Galega da Língua; Tomás González Ahola, membro de Urco Editora; Pepe Arias, director do proxecto Corsárias; e Carlos Figueiras, integrante de Estaleiro Editora.

Esta será a dinámica das xornadas, cuxa programación pode consultarse no blog de Estaleiro Editora, accesíbel dende a súa páxina web (www.estaleiroeditora.org). Haberá máis presentacións de libros, como os que está a piques de distribuír o colectivo Derriba sobre o pensamento de Toni Negri e Gianni Vattimo, e de revistas, caso de Salamandra, do Grupo Surrealista de Madrid. Tamén haberá outras dúas mesas redondas, unha dedicada á difusión de contidos con licenzas libres -mércores ás 19.00 horas- e outra sobre arte e subversión na Galicia contemporánea -xoves, tamén ás 19.00 horas-.

Fonte: Xornal de Galicia