Asociación Galega de Editores

As editoriais galegas en Liber 2009

lunes, 28 septiembre 2009

Vintecino editoriais galegas participarán no Salón Liber 2009, que este ano terá lugar nas instalacións de IFEMA, en Madrid. O stand galego, patrocinado pola Consellería de Cultura, contará coa mostra das novidades  editoriais galegas. O encontro profesional dos editores inaugúrase o día 6 de outubro no Auditorio de Convencións Sur, na 2ª planta do edificio central de IFEMA. A continuación tera lugar a festa Liber e o cóctel de CEDRO. 

 O día 8 ás 13:00 horas terá lugar o xa tradcional viño galego que os patrocinadores e os editores ofrecen aos seus convidados: representantes dos gremios integrantes da FGEE, Casa de Galicia en Madrid, xornalistas, escritores, empresarios galegos residentes nesa cidade, etcétera. O acto contará coa presenza do Director Xeral de Cultura, Francisco López  Barxas, e do Presidente da AGE, Alfonso García Sanmartín. No serán desa mesma xornada terá lugar  unha mesa redonda na que se debaterá sobre   Xornalismo e  Literatura,  e na que participarán os escritores galegos: Luísa Castro, Carlos Reigosa, María Canosa  e Xosé Carlos Caneiro. 

                                                     Presenza internacional

Máis de  1.000 profesionais de todo o mundo están convidados a participar no Liber, tendo como obxectivo o apoio ao fomento das relacións comerciais do sector editor. A Federación de Gremios de  Editores de España, que promove a feira, puxo en marcha diversos programas de actuación dirixidos aos compradores internacionais de máis de 70 países. Así mesmo viaxan e participan no evento máis de 100 personalidades do  eido internacional do libro, responsables de políticas de educación, fomento e promoción do libro, bibliotecarios de universidades americanas, catedráticos e outros  representantes de  institucións e organismos públicos, amáis do sector do libro de España.  

A feira tamén puxo en marcha o  programa de convidados  de ámbito estatal  que reunirá a distribuidores, libreiros  e bibliotecarios,  amáis de diferentes accións promocionais de  especial interese. Participan en Liber 700 empresas  procedentes de 20 países e preto de 800 fondos editoriais.

Foto :Arquivo AGE-2008