Asociación Galega de Editores

Ferrol abre o calendario feiral do libro galego

jueves, 22 abril 2010

Ferrol inaugurou onte mesmo, no Cantón de Molíns, o calendario das feiras do libro de Galicia coa apertura da 21.ª edición deste encontro anual do libro cos lectores. A estrea ferrolá coincidiu coa presentación en Santiago das dez celebracións programadas en toda Galicia ata finais de agosto por parte do conselleiro de Cultura, Roberto Varela, e do presidente da Federación de Libreiros de Galicia, Xurxo Patiño, e a sinatura entre ambas entidades, responsables da organización das feiras, dun convenio polo que a consellería inviste 36.000 euros para as actividades paralelas.

O programa destas «celebracións culturais de primeiro nivel», como as definiu Roberto Varela, non ofrece novidades sobre o das últimas edicións destes encontros, que se desenvolven dende hai 39 anos promovidas pola Federación de Libreiros de Galicia, e dende hai uns anos coa dirección e o patrocinio da Consellería de Cultura.

As dez citas noutras tantas cidades e vilas de Galicia montaranse nunha estrutura de 3.500 metros cadrados de exposición e venda de libros en casetas e coa carpa para as actividades culturais, que ocupa case a metade do espazo. Hai un programa específico para cada certame, pero a oferta no seu conxunto inclúe espectáculos de maxia e sesións de contacontos, recitais poéticos e obradoiros de ilustración, de marcapáxinas e de gardalibros, así como de teatro infantil. As representacións teatrais, monólogos de humor e concertos de música clásica completan o variado programa, dirixido a un público heteroxéneo en idades e intereses.

Fonte: La Voz de Galicia