Asociación Galega de Editores

O Foro do CCG conclúe que o sector cultural debe ser considerado factor relevante para a economía produtiva

miércoles, 23 junio 2010

O Foro "Cultura e mercado", terceiro dos cinco "Foros de reflexión estratéxica sobre a cultura galega", organizados polo Consello da Cultura Galega e coordinado por Francisco Campos (Universidade de Snatiago) contou onte cos relatorios de Victoria Ateca (Universidade do País Vasco) e Pau Rausell (Universidade de Valencia).

Victoria Ateca aludiu á importancia do estudio do impacto económico da cultura e ás dificultades para a necesaria armonización dos criterios a aplicar. Falou do impacto da innovación tecnolóxica e os cambios que conleva: a cada vez maior interacción, a conectividade e a converxencia, derivada das alternativas aos modos tradicionais de consumo. Aludiu á centralidade da experiencia cultural, marcada pola ampliación das audiencias,a profundización dos compromisos e a diversificaciòn en novos públicos. "Pasamos dos procesos orientados ao produto a outros que teñen especialmente en conta aos participantes-consumidores cos seus hábitos modificados a causa do impacto da aplicación das tecnoloxías da información e da comunicación e da implantación da sociedade do coñecemento, na que xogan un papel determinante os contidos culturais".

Democratización e creación

Pau Rausell referiuse á necesidade de cambiar as políticas culturais para facelas máis eficaces e eficientes e describiu o sector cultural como emerxente, de amplo espectro e altamente produtivo, pero intensamente afectado polas transformacións tecnolóxicas "esa circunstancia  converte en volátiles os entornos e multiplica a competitividade e os competidores, o que obriga a ter moi en conta o que levan a cabo os demais". Nise entorno outro dos condicionantes deriva do feito da caída dos costes de creación, produción e fabricación cultural, en directa relación coa dixitalización e con Internet, orixe dunha democratización da creación cultural.

Oportunidades

No documento elaborado con anterioridade sobre as industrias culturais en Galicia, logo das respostas a unha enquisa previa, aparecen seis oportunidades a considerar. Están relacionadas coa multiplicaciòn das posibilidades de produción e aceso á cultura da man da sociedade da información e das TIC como potencialidade para prolmocionar a produción cultural galega e os cambios nas formas de consumo cultural. Aluden asemade á conciencia do peso económico da cultura e do seu valor para o desenvolvemento e á nova centralidade da cultura como fornecedora de contidos na sociedade do coñecemento. Falan por último da fusión das caixas de aforro "como oportunidade para aproveitar mellor o seu valor no sistema cultural e na sociedade galega".